BHARATH TELUGU NEWS , Publish Date - Oct 08, 2026 | 11:57 AM

అక్టోబర్ 8: ఏపీ ముఖ్యమంత్రి చంద్రబాబు నాయుడు ఢిల్లీ పర్యటనలో భాగంగా కేంద్ర మంత్రులతో వరుసగా సమావేశమవుతున్నారు. గురువారం కేంద్ర జల్‌శక్తి మంత్రి సీఆర్ పాటిల్‌తో చంద్రబాబు భేటీ అయ్యారు. ఈ సందర్భంగా రాష్ట్రానికి సంబంధించిన పలు కీలక అంశాలపై ఇరువురు చర్చించారు.

ప్రధానంగా ఆంధ్రప్రదేశ్‌లో కొనసాగుతున్న పోలవరం ప్రాజెక్టు పనుల పురోగతిని చంద్రబాబు కేంద్ర మంత్రికి వివరించారు. అలాగే ఇటీవల రూ.30 వేల కోట్ల అంచనా వ్యయంతో చేపట్టిన జల్ జీవన్ మిషన్–అమరజీవి జలధార పనుల ప్రస్తుత పరిస్థితి, ప్రాజెక్టు పురోగతిపై కూడా వివరాలను వెల్లడించారు. రాష్ట్రంలో నీటి వనరులు, తాగునీటి సరఫరాకు సంబంధించిన అంశాలపై కేంద్ర సహకారం అవసరమని ఈ సందర్భంగా చంద్రబాబు వివరించినట్లు సమాచారం.

మూడు రాష్ట్రాల ప్రయోజనాలను దృష్టిలో ఉంచుకుని పరస్పర సహకారం, సమన్వయంతో పోలవరం సంబంధిత అంశాలను సామరస్యపూర్వకంగా పరిష్కరించుకోవచ్చని సీఎం చంద్రబాబు నాయుడు పేర్కొన్నారు. అన్ని రాష్ట్రాలకు ప్రయోజనం చేకూరేలా ఇచ్చిపుచ్చుకునే విధానంతో ముందుకు సాగాల్సిన అవసరం ఉందని కేంద్ర మంత్రి సీఆర్ పాటిల్‌కు వివరించారు.

పోలవరం ప్రాజెక్టు వద్ద 41.15 మీటర్ల కాంటూరు స్థాయిలో నీటిని నిల్వ చేసేందుకు అవసరమైన పునరావాసం, పునరావాసం-పునరావాస ప్యాకేజీ (R&R) పనులను వేగవంతం చేస్తున్నామని చంద్రబాబు తెలిపారు. ప్రాజెక్టు నిర్మాణానికి ఎంత ప్రాధాన్యత ఇస్తున్నామో, నిర్వాసితుల సమస్యలను పరిష్కరించడం, వారికి పునరావాస సౌకర్యాలు కల్పించడానికీ అదే స్థాయిలో ప్రాధాన్యత ఇస్తున్నామని చెప్పారు.

పోలవరం ప్రాజెక్టు పనులు నిర్ణీత లక్ష్యాలకు అనుగుణంగా కొనసాగేందుకు నిధుల ప్రవాహంలో ఎలాంటి ఆటంకం లేకుండా చూడాలని సీఎం చంద్రబాబు కేంద్ర మంత్రిని కోరారు.