BHARAT TELUGU NEWS, Publish Date - Oct 04 , 2026 | 23:00 PM

రష్యాతో భారత్‌కు ఉన్న చారిత్రక సంబంధాలను విదేశాంగ మంత్రి ఎస్. జైశంకర్ మరోసారి బలంగా సమర్థించారు. భారత్ భద్రత, సమగ్రతకు ముప్పు వాటిల్లిన ప్రతిసారీ రష్యా అండగా నిలిచిందని ఆయన పేర్కొన్నారు. పాశ్చాత్య దేశాల నుంచి విమర్శలు వస్తున్నప్పటికీ, భారత్ తన అనుభవాల ఆధారంగానే రష్యాతో సంబంధాలను కొనసాగిస్తుందని స్పష్టం చేశారు.

ఢిల్లీలో జరిగిన మ్యూనిచ్ లీడర్స్ సమావేశంలో ‘ఫ్రమ్ న్యూఢిల్లీ టు న్యూ మొమెంటమ్’ అంశంపై మాట్లాడిన జైశంకర్.. దేశాలు తమ చరిత్రను, గత అనుభవాలను మర్చిపోవని వ్యాఖ్యానించారు. 1950ల నుంచి అనేక దేశాలు పాకిస్థాన్ సైనిక రంగానికి మద్దతు ఇచ్చినప్పటికీ, సోవియట్ యూనియన్ భారత్‌కు అండగా నిలిచిందని గుర్తుచేశారు. ముఖ్యంగా 1971 భారత్‌-పాక్ యుద్ధ సమయంలో సోవియట్ యూనియన్ అందించిన మద్దతును పరోక్షంగా ప్రస్తావించారు.

రష్యాతో భారత్ బంధం ప్రత్యేకం

రష్యాతో భారత్ సంబంధాలను ప్రశ్నిస్తున్న పాశ్చాత్య దేశాలకు జైశంకర్ తనదైన శైలిలో సమాధానమిచ్చారు. ప్రతి దేశానికి సొంత అనుభవాలు ఉంటాయని, వాటి ఆధారంగానే విదేశాంగ సంబంధాలను నిర్ణయించుకుంటుందని చెప్పారు. రష్యాతో భారత్‌కు ఉన్న అనుబంధం సానుకూలమైనదని, దాన్ని ఇతర దేశాలు కూడా అర్థం చేసుకోవాలని స్పష్టం చేశారు.

రష్యా చమురు కొనుగోలుపై కీలక వ్యాఖ్యలు

ఉక్రెయిన్ యుద్ధం నేపథ్యంలో రష్యా నుంచి భారత్ ముడిచమురు కొనుగోలు చేయడంపై పాశ్చాత్య దేశాలు చేస్తున్న విమర్శలను ఆయన తోసిపుచ్చారు. భారతీయ వినియోగదారుల ప్రయోజనాలను కాపాడటం ప్రభుత్వ ప్రధాన బాధ్యత అని పేర్కొన్నారు. దేశానికి అవసరమైన ఇంధనాన్ని వివిధ మార్గాల ద్వారా సమకూర్చుకోవడం భారత్ హక్కు అని స్పష్టం చేశారు. ఇంధన సరఫరాలో అంతరాయాలు లేకుండా చూడటమే ప్రభుత్వ లక్ష్యమని తెలిపారు.

రష్యా-ఉక్రెయిన్ యుద్ధంపై భారత్ వైఖరి

రష్యా-ఉక్రెయిన్ యుద్ధానికి ముగింపు పలికేందుకు భారత్ దౌత్యపరమైన ప్రయత్నాలు కొనసాగిస్తోందని జైశంకర్ వెల్లడించారు. నల్లసముద్రంలో నౌకల రక్షణ, ధాన్యాల ఎగుమతులు, ఇంధన సరఫరా, మౌలిక సదుపాయాలపై దాడులను నిలిపివేయడం వంటి అంశాలపై ఇరు దేశాలతో చర్చలు జరుపుతున్నట్లు తెలిపారు. యుద్ధం ప్రకటనలకే పరిమితం కాకుండా, దానికి శాశ్వత ముగింపు లభించేలా ప్రయత్నాలు జరగాలని అభిప్రాయపడ్డారు.

ఈ సందర్భంగా ప్రధాని నరేంద్ర మోదీ చెప్పిన ‘ఇది యుద్ధాల యుగం కాదు’ అనే మాటలను జైశంకర్ ప్రస్తావించారు. యుద్ధం కొనసాగడం కంటే శాంతి నెలకొనడం ముఖ్యమని వివరించారు.

వాణిజ్య సంబంధాల విస్తరణపై దృష్టి

విదేశాంగ వ్యవహారాల పార్లమెంటరీ సలహా కమిటీ సమావేశంలోనూ జైశంకర్ పాల్గొన్నారు. రష్యాతో వాణిజ్యం, ఇంధన రంగాల్లో సంబంధాలను మరింత విస్తరించేందుకు భారత్ సిద్ధంగా ఉందని సభ్యులకు వివరించారు. అంతర్జాతీయంగా మారుతున్న పరిస్థితుల మధ్య దేశ ప్రయోజనాలకు ప్రాధాన్యం ఇస్తూ విదేశాంగ విధానాన్ని కొనసాగిస్తామని ఆయన వ్యాఖ్యలు స్పష్టం చేస్తున్నాయి.